الناس أجناس

0

بقلم : إبراهيم محمد رمضان

صباحكُم ورد معَطر
ناس حمداه وناس تتبطر

ناس أكلتها كباب كُفته
وناس مش لاقيه اللقمة تفطر

ناس بتزن وناس بتأن
ناس بتشكي وناس بتشكر

ناس جوعانه وناس فجعانه
وناس طماعة وعاوزه أكتر

ناس كئيبة ودمها يلطش
وناس شربات وزي السكر

ناس ضاربالك الدنيا طناش
وناس مشغولة دايما بتفكر

ناس بتصلي الفجر جماعة
وناس سهرانه الليل بتسكر

ناس للرشوة بتمد إيديها
تعطيها ماتشبع تقول لك أكتر

ناس بترضى تأكلها بدقة
يقرصها الجوع بترضى وتصبر

ناس بتشوفها هادية جميله
وناس بتشوفها جن مصور

ناس بتبيعها بتبخس حقك
ولما تبيعك عليك تتشطر

ناس بتشوفها بتفتح نفسك
وناس بتشوفها . الله أكبر

ناس بتشوف الناس بتموت
قلبها قاسي وما بيتأثر

ناس بتشق طريقها الصعب
وناس مرتاحة وبتتعثر

ناس بتعيش معاك في سلام
وناس من غير أسباب بتغدر

ليه تمسك لي في إيدك وردة
وايدك التانية ماسكة لي خنجر

ليه ماتكونش أخويا وصاحبي
وأكون لك دايما شهد مكرر

ليه ماتكونش الناس للناس
وديما للأفضل تتغير

اترك رد

لن يتم نشر عنوان بريدك الإلكتروني.