القناص

0

بقلمي.. أبو عدنان

يا قناص دوس على الذناد

وصوب في الهوا

بلاش رقاب العباد

مش لاقيين حق الدوا

ثورة الجياع بتتعاد

والظلم زاد واستوى

اللي كال حقي وحقك

سرق ارضك وعرضك

واللي اتعود على جلدك

هوا هوا نفس القناص

لية يا بلدي خيرك مش ليكي

روحي مهري لو يرضيكي

نفسي ف عدل يحميني و يحميكي

إحنا كلنا ولادك

إحنا كلنا ولاد ناس

يا قناص دمي سايل

م الهم ياما شايل

اقول ولا مانيش قايل

إحنا ف طريق واعر ممنوش بدايل

بنحلم بعالم العدل يكون فيه أساس

بروي ترابك يا بلدي بدمي

مين حاسس ب وجعي و همي

بيموتو فيكي ولما نتكلم

يقولو دي حتة مني دي أبويا وأمي

مع إن البطن واحدة

الوزير والكناس

إبنك العاصي مستكتر اللي ف أدينا

حتى المية بيستخسروها فينا

إحنا ولادك صح

ولا جينا غلط ف دنيا مش لينا

محتاجين حبك يغطينا

أيد واحدة ضد الفساد

بضمير وصدق وإخلاص

صوت البارود بيلعلع

مع طفل يتيم بيدمع

وكتير بيعرق ويزرع

وواحد يحصد ويجمع

وشعبك بيعلن الإفلاس

يا قناص دوس على الذناد

وصوب في الهوا

بلاش رقاب العباد

مش لاقيين حق الدوا

ثورة الجياع بتتعاد

والظلم زاد واستوى

بنحلم بعالم العدل يكون فيه أساس

وقانونك يا بلدي ع العين و الراس

اترك رد

لن يتم نشر عنوان بريدك الإلكتروني.