*** دم رخيص *** بقلم / مصطفى كرم

بقلم / مصطفى كرم

 

أيوه يا أمه جاي خلاص

راكب قطري وكلي حماس

وفيت يامه حق بلادي

وجاي لفرحي ويا الناس

أعزمي يامه كل الأحباب

وادعي قرايبي والأصحاب

حتى لو حد فيه بينا خلاف

صالحيه دغري وبلاش عتاب

عايز الكل يفرح ويانا

وتبقى الفرحة مش سيعانا

ونعيش يامه همه يومين

خلينا ننسي مر شقانا

لحظة يامه سامع صوات

وناس بتجري في الطرقات

زحمة كتيرة وكله بيهرب

وقطر ورانا كسر الحجوزات

ااااااه

الحقي يامه طفل وليدك

شكله مفارق هيسيب إيدك

ويروح جنة رب الكون

وابقي ادعيله دا هو شهيدك

وإياك تقبلي منهم دية

أو كلمات معسولة هنية

يظهروا بيها في القنوات

كفاية بقى شعارات وردية

زهر شبابنا راح بأيديهم

وكان بغلطهم هو الضحية

دمنا ليهم سعره رخيص

يقابلوه ديما بالتهجيص

كام ملطوش تمن الموت

وحقنا يبقى راح فطيس

وتنعاد الكره ييجي مية مرة

وندوق فيها أيام مرة

واللي قتلنا وكان الجاني

سكران طبعا شارب خمرة

قولوا لنا بس نحاسب مين

لو فاكرينا بني آدمين

نفسنا مرة نحس قيمتنا

وحقنا نأخده من الظالمين

**************************

بقلم / مصطفى كرم

التعليقات مغلقة.